The legendary Road Trip :)

Hola chicas y chicos!

Hoffe eu gahts allne guet. Also ich bin wunderbar reläxt! Wieso? Ich ha därfe uf dem legendäre Road Trip debi si! Woha. Aber ja alles mal vo vorne. Da d Spanier sehr katholisch sind, händ all Studente für meh als e Wuche frei gha (Semana Santa nännt sich das). Aber was macht mer i dere Wuche?! Lerne? Zwar känned mir ja d Martina als es fliessigs Meitli aber das mal hät sie alles ligge la und isch mit paar verruckte Lüüt uf na en verrucktere Road Trip gange. Ihr chönd eu chum vorstelle wie ufgregt ich gsi bi wo ich gmerkt ha das ich au därf mit!

Am 3. April isches losgange, zwar isch d Martina erscht gäg de Abig z Salamanca acho (sie hät da na was wäg de Lohnareiz müesse mache) aber das hät de Vorteil gha, das sie nöd na hät müesse es Hostel sueche wil das die andere scho erlediget händ! ;) Aja, mer muen säge: Organisiert isch eigentli überhaupt nüt gsi, was au de wiiteri Verlauf vo de Reis erchlärt! Nach ere Tapas Tour isch d Reisetruppe dänn i de berüehmt berüchtigte Chupiteria glandet. Shots soweit das Auge reicht. D Dame us de Gruppe händ sich dänn a paar schoggi-haltigi Shots genemiget, während d Herre eher Absinth händ welle trinke... d Uswürkige hät mer dänn am Schluss au klar gseh... d Fraue händ d Manne müesse heiträge! Wie au immer, de nägscht Tag isch dänn natürli um einiges reläxter agange worde...
En Tag später händ sich all uf nach Porto gmacht! Es Hostel isch au schnell uftriebe gsi, mit ganz luschtige Hosts! Shopping, Schoggichueche ässe, Wii trinke isch det agseit gsi! Nur hät s Wätter leider nöme so welle mitspiele.... :( Drum hämmer Porto dänn au gli gseh gha und d Reisegruppe hät eistimmig entschlosse uf Lissabon wiiterzga.... Hostel suechi isch das mal im vorus agseit gsi.... Sie händ dänn e geniali Idee gha:Ufeme Camping häts anschienend na Platz.... ime bungalow.... Reserviert. Doch det acho hät d Martina dänn gseit sie heg e Reservierig, naja, isch dänn nöd so gsi.... sie händ öppe 3 Stunde nach de Reservierig gschriebe gha das sie kei Platz heged für eus. Phuu. Zum Glück händ mir so enttüscht driglueget, das sie eus dänn glich na für 2 Täg es Hüüsli gä händ. Für de Rescht vo eusem Ufenthalt hämmer eus dänn halt es Zält bsorget... abentüürlich chani nume säge. Lissabon hät mir persönlich sehr guet gfalle... vor allem wil ich sogar mit an Strand han därfe. Voll kuul nöd? Am nägschte Tag isch Sight-Seeing agseit gsi und d Verabschiedig vo de Kerstin, wo scho früener wieder zrugg uf Madrid hät müesse. Zur Feier des Tages händs drum e Bus-Bahnhofparty gfiiret.... wos dänn chli z chüel worde isch sinds wiiter id In-Disco Lux (für gratis ;)). ich han aber dänn leider nöd mitdärfe, d Martina hät zwar zum underdresste, unstylische Part vo de Lüüt ghört, aber ich glaub ich het das au nöd viel chöne verbessere. Trotzdem hegis riese Spass gmacht und s Zält seg dänn a dem Morge au gar nöd so unbequem gsi. Viel bracht hät de Tag aber dänn eigentli nöme, nachli Shopping im Shopping Center... doch de nägscht Tag isch defür wieder Sightseeing agseit gsi... Belem.... en Vorort vo Lissabon. Det häts e Bäckerei gha.... und jede Tag häts det immer e riese Warteschlange gha, egal um welli Uhrziit. Naja, da muesses öppis guets gä..... hämmer dänn au usegfunde: Pastis de Belem. Yammy. Schnell ischer verbii gange de Tag.... und scho sind mir ufem Wäg zum Busbahnhof gsi..... und schneller als mer dänkt händ au wieder im guete alte Madrid, wo immer öppis lauft :)

meld mi eventuell baaaald wieder mit neue Stories.
Besos

Föteli: 1. die verruckt Reisegruppe 2. Salamanca 3. Porto bi Nacht 4. Lissabon 5. Strand in Lissabon, juhuui :)

Bsuech us de Schwiiz!

Hola Hola!

So es wär wiedermal Update-Ziit! Sitem letschte mal isch zwar glaub gar nöd so viel gloffe, d Martina isch emel meh als gwöhnlich dihei gsi... öb das a de Schuel gläge isch?

Aber mal vo afang a: Also vorletscht Wucheend isch Bsuechswucheend gsi da z Madrid! D Bri und de Andi sind am Fritig itrudlet. Und was macht d Martina? Hockts mit de Holländer im Parque de Retiro, sünneled, wo uf eimal ihres Telefon schälled.... "Brigitte ruft an"... "ah sie wot sicher fräge wo mir eus morn träffed"... "ja, hoi!" .... "was ihr sind scho z Madrid?!?!?! Ups."..."ha gmeint ihr chömed erscht morn?!?" Also ich als Frosch ha ja eigentli nüt z säge, aber ich sägs jetzt glich: Martina, das isch sowas vo peinlich!!! Defür sinds dänn am Abig zerscht chli dur d Stadt gloffe und dänn go ässe. Vor em ässe hät d Bri na müesse wäg Schueh go luege, au es Erläbnis gsi. Öppe 8 Verchäufer händ sich um sie kümmered, und erscht nach öppere halb Stund händs gmerkt das die eigentli scho lang händ welle zuemache:) nachem Esse sinds na eis go trinke, d Bri nume es Mineralwasser... doch s Föteli hät sie dänn in spanischer Manier mit mim Sangria gmacht ;)

Am nägschte Tag isches dänn wiitergange: Schueh Shopping isch agseit gsi! Für das sind glaub eimal dur Madrid und zrugg :) Und zum Glück händs dänn au nachem öppe 20ste Schuehlade passendi gfunde! Olé. Am Abig händs au na d Marija und de Sven (also nöd ihre Fründ, gäll Andi) troffe. I de La Latina (dem In-Viertel vo Madrid) ischs dänn zerscht ine Bar mit Dachterrase zum de erscht Tinto de Verano bzw. s erscht Cerveca z gnüsse. Wo all Hunger gha händ sinds ines Reschti (d Martina hät natürli wiedermal kein Plan gha... Note 1 als Stadtfüehrin echt!!). Trotzdem segis emel fein gsi. Das mal häts zum Glück d Charte au uf Düütsch gä (Dix händs das mal chöne ide Täsche la ;)).

Am nägschte Tag händ d Bri und de Andi chli usgspannt im Retiro mit eme Kolleg vom Andi, defür händ d Marija und d Martina d Stadt unsicher gmacht... es isch an Rastro gange (es Paradies für all wo gern Chramsch chaufed). So hät sich ihri Usbüüti au gseh la! Nachere Verpflägig im Museo del Jamon händ sie dänn na d Souvenir Läde abklapperet zum Schueh für de Marija ihri Nichte z finde! Schliesslich händ die zum neue traditionell spanische Chleidli müesse passe! aber dänn häts leider au scho baaald gheisse abschied nä, d martina hät mir verzellt das sie sich ja eigentli hät welle is Gepäck ineschmuggle, aber es hetti det nur Platz gha für mich... tja so chas ga :)

Die nägscht Wuche isch dänn au nöd sooo spektakulär gsi. Ussert das d Nora na es Interview mit de Martina hät müesse mache... uf Spanisch. Ich glaub ohni Tinto de verano het sie keiiis Wort usebracht. Die lang Nacht (natürli isches nachher na wiitergange) hät erscht öppe am 8i am Morge gändet. Han also d Martina scho vermisst gha. Aber niemert muess sich Sorge mache, sie hät mir versicheret das sie nöd neumet andersch gschlafe hät (wie eusi Mitbewohnerin so fräch gfräget hät). Zmorge häts fäng am halbi vieri gä und id schuel isch sie aber trotzdem na! (Vorbildich!!!) Fritig Abig hät sie müesse Ufzgi mache (nüt mit Usgang, nei nei!) und am Samstig hät ja scho de eint Holländer sin 21ste gfiiret. Strengs Wucheend, wil am Sunntig sind wieder Ufzgi ufem Plan gstande. UBS und sini Lohnareiz... analysiere. Ja viel Spass dänn. Eimal meh bin ich froh bini nur en Frosch (wo jetzt sogar au es grössers Zimmer hät! juhuuuii)

Hasta luego....

Fötelis: 1. Bri "trinkt" Sangria 2. d Büüti 3. Abschiedsbild am Flughafe 4. Calimocho.... da brucht mer ken Dix meh. Rede gaht dänn wie vo selber :)

... isch doch alles nur Hippiekacke...

Hola a todos en suiza y en todo el mundo! :)

Ich weiss, ich weiss, die wo jetzt ide Schwiiz hocked wärded gli voll nidisch si (es wiiters mal wil d Martina das allne sicher scho hundertmal under d Nase griebe hät) aber z Madrid isch es sunnig, bi öppis meh als 20 Grad (hüt häts 24 Grad azeigt am Namitag :)). Mir chönd da also würkli nöd chlage! D Martina hät gseit sie heg i letschter Ziit voll kei föteli gmacht, drum chani jetzt leider au ke Bewiis liefere (aber ihr chönds eu ja sicher vorstelle, wie mir jetzt amig im Parque de Retiro hocked und d Sunne gnüssed!). Aja und mached eu ke Sorge, d Martina hät scho Sunnecräm gchauft, Stärchi 40, demit sie sich ja nöd verbrännt und au ja nöd brun wird!

Naja, was hämmer no so erläbt? Aso ich nöd so viel, wil d Martina isch so e fliessigi Schüelerin und gaht immer id Schuel wänn sie sött (au wänn sie teilwiis ischlaft, aber pscht ich ha dänn also nüt gseit gälled). Und ja ide Schuel passiered halt nöd so ufregendi Sache. S Ufregendschte isch wohl de Schüelerstreik gsi bzw. d Demonstration wos verastaltet händ. Also mer muess sichs Edificio 15 vorstelle, e Hampfle vo Rebelle (oder Hippies) wie mers au immer wot nänne, wo im Schuelhuus ine zältet wils d Bolognia-Reform scheisse findet! D Klass vo de Martina hät also dänn au nöd schlächt glueget, wo de Demonstrationszug i ihrem Schuelzimmer glandet isch während sie e "Prüefig" gha händ.

Suscht isch d Martina fliessig am Spanisch rede... glaub sie findt de Spanisch-Kurs au na glatt.... s heg ein ganz komische Mänsch dete. So en Möchtegärn-ich-binen-wil-ich-gäld-ha-Typ halt, wo jetzt fulana (=Prostituierti) als neus Lieblingswort hät wo er jetzt bi jedere (un)mögliche Glägeheit benutzt (aber er därfi das ebe, er hebi ja "Freunde auf Mallorca").

So ich glaub ich muen gli go ässe, d Martina isch fascht zur Starchöchin worde da... heieieieieiei :) und nacher gaht sie na ane Cocktail-Party bi de Holländer-Fraktion. Und ich ha Durscht und därf nöd mit, voll gemein!!!!

hasta luego y besos de madrid
la rana bzw. frogerella :D

... und schowieder zwei Wuche verbi....

Uff, je so kuul, jez chan ich mal us erschter Hand chli öppis brichte. Ha nämli s erscht mal därfe mit ufe Reis! Olé. Aber zerscht mal vo Afang a... wobi mer ja eigentli über de Afang vo de Wuche meistens nüt z brichte hät, ussert dases wieder mal en riese Saumais im Schuelzimmer gsi isch. Also ich chum das ja nöd live mitüber, aber wie d Martina seit isches würkli übel... mer chöng sichs öppe vorstelle wie innere Bar, wil flüschtere känned die spanische Mitschüeler nöd. Janu. Aja, ich bin ja nöd so de Vegi, aber anschinend gits ide Nächi vo Opera e Tapasbar wo am Mittwuch bis am 10ni Happy Hour hät. Das heisst alles für 1 Euro, au die hammer feine riesige Salät!! Ich glaub ab jez muni jede Mittwuch eleige dihei hocke.... :( Also ebe, nachere astrengende Party am Dunnstig isches dänn am Fritig wiiter gange uf Salamanca. Det wohnt ja momentan de Jonas. Also was mer grad z erscht märkt: Salamanca isch einiges chliner und günstiger als Madrid: Am Abig simmer go Tapas ässe und Shots trinke (10 für 5 Euro). Ken wiitere Kommentar. Dänn am nägschte Tag isches uf gange mitem Bus uf Ciudad Rodrigo. Det händ sich wagemuetigi Männer mit de Toros dur d Strasse triebe laa (Pamplona lässt grüssen), vieli Verchleideti händ sich paar Bierli gnehmiget und schlussendli sind au na vieli Schauluschtigi (drunder au mir) go en Stierkampf luege. Naja, muen säge, das die Stierkämpf also gar nöd mis Ding sind! Trotzdem es guets Erläbnis gsi und Salamanca hät eus also au guet gfalle :) Die nägscht Wuche isch au schnell verzellt: Nur mit eim Underschiid, d Klass hät sich inzwüsche zimli beruhigt, wil de Fabrizio "itse-mee-mario" eifach mal so churzerhand drü Schüeler usegrüehrt hät! Oléééé! Am Fritig isch denn de Manu endli uf Madrid cho! A dem Wucheend händ die zwei so einiges gseh vo Madrid: Vieli Tapas Bars (mit viel Bier ;)), de Parque Retiro, s archeologische Museum, die berüehmtischt und angeblich beschti Churreria vo Madrid, d Superhelde wo die Stadt beschützed, en kuule Rockclub, es super Hippie-Restaurant und und und :) Alles i allem: un fin de samana fantastico!!! :) so eso es por el momento! Besos de Madrid, la rana


Uf de föteli:
- Wagemuetigi wo mit de Stiere dur d Strasse ränned (Ciudad Rodrigo)
- D Profis am Werch (Ciudad Rodrigo)
- Es isch ja sooo öppis vo warm z Madrid (emel sicher im Gägesatz zu de Schwiiz ;o))
- Manu's Welcome Beer

Granada!

Hola hola....!

Wow, hüt vor drü Wuche sind mir bechlaut worde und das heisst glichziitig au: drü Wuche ohni en wiitere Diebstahl überläbt! Olééééé! Au die letscht Wuche hät mich d Martina wieder zuetexted mit Stories, wo ich dänn biiiitte biitte a die liebe Blogleser wiiterleite söll. Und ja, sie meint au ihr sölled ruhig au eue Sänf dezue gä, wänner das läsed! :)

Wie au immer! Also d Wuche dur isch glaub nöd sehr viel passiert, d Martina isch nach wie vor seriös und gaht meistens id Schuel. Natürli gahts sie seriös wie sie isch amig au es Cerveza mit de anderne go nä, au das ghört ja schliesslich dezue! Am Fritig isch sie dänn eifach (natürli ohni mich!!!!!!! tsssss) uf Granada gange. D Helde vom ESN händ wieder mal alle gä mitem organisiere, de hammer! Also am Fritig häts zerscht e Stadtfüehrig gä durd Stadt.... natürli hämmer scho det die erschte warme Sunnestrahle chönne gnüsse! Und nachher au scho die erschte Tapas und die erschte Cervezas natürli (1.70 Euro es Bier und Tapas) Super Sach!

S Abig Programm isch au genial gsi: Flamenco-Show und e Bar wo es Bier oder en Tinto de verano nur 0.50 Euro gchoschtet hät. Dementsprechend isch de nägscht Morge fürd Martina glaub chli härt gsi.... am 10.30 (aso ja e halb Stund später) händ sie sich troffe für id Alhambra. Aso wär mal d Glägeheit hät: es seg sehr empfehlenswärt! Nach de Füehrig und nachdem die die unschlüssige-mir-wüssed-nöd-bi-wellem-Kebabstand-mir-sölled-en-Kebab-chaufe-Franzose abghänkt händ, händs sie sich au s eis oder zwei Bierli gnehmiget mit de dazuegehörige Tapas. Yammy. Nacheme Abstächer is Arabische Viertel simmer dänn au scho wieder Richtig Hostel wos a dem Abig Paella und Sangria gä hät. Nöd mal so schlächt wänn die Meeresviecher nöd dine wäred :)

Da d Mexicaner zimlich luut reded, wäred die liebe Lüüt na fascht usem Hostel gschmisse worde bzw. fascht wär d Polizei cho. Drum händs dänn schläunigscht müesse wiiter ine Bar! Underwägs händs na es chliners Botellon gmacht, also ja d Spanier under ihne natürli nur, wil d Schwiizer wüssed ja was das cha für Problem gä! :) De Abig isch dänn au wiitergange mit es Paar Sangrias und viel Fiesta. Am 6i händs dänn aber chlineri Problem gha.... d Nora isch scho längstens dihei gsi, d Kerstin hät nöd ihri Jagge sondern am Pablo (au bekannt als de mitem Schwiizer Nachname) sini Jagge zrugg übercho. Blöd isch gsi: de Hotel Schlüssel isch ide Jagge gsi und de Pablo verscholle i de Menschemängi vo dem Club. De Damien hät dänn au grad zrugg welle, gueti Glägeheit hämmer dänkt: chömed mer wenigstens vor eusi Zimmertür. Naja vor de Haupttür acho, teilt eus dänn de liebi Damien mit: Ahhh, yo no tengo un llave! Claro, superbien! Nachdem mer all Lüütene mehrmals usprobiert händ, hät nach öppe 10 min endli öpper ufgmacht. Oléé. Naja, nach dem grosse Missgschick isch de nägschti Tag zimli i gordnete Bahne verloffe, würkli öppis mache hät nämli niemert möge! :)

Hejo, hüt han ich drum au Gsellschaft dihei, d Martina därf wäsche, putze, Ufzgi mache und ich chill e Rundi (was mir doch extrem besser gfallt :))

Also also, hasta luego y un beso de madrid.
martina

Schiffliversänkis isch geschter gsi.....

Holaaa, also wänn ihr mich fräged, erläbt d Martina eifach zviel. Finds also gar nöd lässig wänn ich da de ganz Tag muen Sekredüse spiele, but whatever... sie isch de Boss.

Also d Fiesta isch dänn würkli relativ lang gange am Dunnstig... glaub am 5i isch sie fängs heicho. tsssss. Und am Fritig isch ja dänn schowieder Pub Crawl agseit gsi (natürli wie immer organisiert vo de Helde vom ESN!) Doch dasmal sind gar nöd so viel Lüüt uftaucht, am 22.30 (Treffpunktziit gemäss Mail) isch d Martina na fascht eleige da gstande nöd mal die vom ESN sind pünktlich uftaucht (aber das isch halt spanischi Pünklichkeit und nöd d Schwiizer). Wo dänn schlussendli glich na paar Nase itroffe sind, ischs losgange.... und am drü han ich mich dänn verabschiedet. A dem Abig hät d Martina einiges müesse ushalte.... eine hät sie so vollgschnurrt, sie hegi so schööööni bloooondi Haar und er känni sie usem Fernseh, das eine vo de Italiener sini Mafiosi Siite hät müesse usehänke und säge: Eeeeh, soy de Napooolii y ella es mi nooviaaa. Dezue vorstelle mun mer sich na so en krass Italienische Akzent, da chunnt jede Angscht über (Ich glaub de Manu wird ihm für die heldehafti Atkion nöd bös si, oder? :))

Dänn am Samstig isch nöd viel los gsi und d Kerstin und ich sind id Stadt gange, eigentli hämmer ja welle is Kino, aber die sind agstande... boa. Also simmer dänn halt go en Kafi trinke. Und mir händ bald gmerkt das die Madrilene scho chli en Egge ab händ (machts mer na sympatischer :)) Wil es paar händ ganz offiziell de Welt-Zombie-Tag gfiiret und chli d Lüüt verschreckt ide Metro und so....

Am Sunntig ischs dänn uf Toledo! Es härzigs Städli öppe 1 Stund vo Madrid entfernt. Euse Guia (hoffe has richtig gschriebe) hät alles gä um dene Erasmusstudente i sim schönschte Spanisch die wichtige Sache über die Stadt z säge. Natürli hät d Martina gar nüt verstande, hanere gseit sie söll sich gfälligscht mal chli astrenge!!! Und am Mäntig en wiitere Höchepunkt (vor allem für mini Schadefreud ;))! D Martina versänkt ihres Natel i ihrem z Trinke. Aso ebe wie mer so öppis cha schaffe, isch echt es Rätsel! naja, uf jede Fall wird das Natel jez entwässered (unglaublich, mer findt unzähligi Tipps im Internet was mer söll mache damits nachher wieder lauft). Wie das genau gaht gsehnder ufem Föteli... haha. Also i dem Sinn, hasta luego.... wird sicher bald wieder vo irgendwelche Missgschick chöne brichte :) besos de madrid, la rana

Fiesta Fiesta.... y estar cansada....

Hola a todos en suiza :)

so schowieder en itrag... d Martina hät mer ebe einiges zu Protokoll gä :) Also ich sie seit immer ich hegis schön, cha dihei hocke und hänge. Und da hät sie wohl rächt, momentan isch lässiger als verruse in Schiff. Aso was d Schuel agaht chöng mer halt nöd so rächt säge nach einere Wuche, die einte Fächer wärded glaub schono happig und Usländerbonus gäbis dänn also gar nöd. Voy a ver.

Also und am Mäntig sinds au eifach ohni mich in Usgang. Uf Chueca, das Viertel für Usgang anschienend. Viel los isch zwar nöd gsi, halt Mäntig oder. Defür aber am Tsischtig. Mer stellt sich das mal vor: En Huufe Erasmus Studente ime Lokal wo Bier verchauft und mer cha Karaoke singe. UiUi. Brucht glaub ke wiiteri Usfüehrige... zum Glück häts da ja au under de Wuche Nachtbüs (nur sött mer dänn wüsse wo mer muen usstiege suscht därf mer am morge am halbi 3 durs verlassne Madrid stürchlä). Und de Nachteil isch halt das mer dänn am nägschte Tag dauernd ipennt, wils da ja au meistens 1.5 voll dureziehnd ohni Pause. Naja, au a das gwöhnt mer sich dänn :)

Hüt hämmer na Spanisch Tescht gha. Und d Martina chas glaub chum glaube das sie nöd i die schlächtischt Gruppe cho isch.... oléé :)

So das wär mal alles, hüt seg wieder Fiesta agseit, zum Glück aber morn glaub erscht Schuel am 17.00. Trifft sich doch super!

also hasta luego y un beso de madrid a todos :)